28/01/12

LA INVENCIÓN DE HUGO CABRET

Orfo, reloxeiro e ladrón, Hugo vive entre os muros dunha atarefada estación parisiense de ferrocarrís. Se quere sobrevivir, ninguén debe saber da súa existencia. Con todo, un día ten un descoido e será descuberto por unha excéntrica moza, amante dos libros, e por un vello e amargado fabricante de xoguetes. E xa nada será como antes. 
Con moitas páxinas de ilustracións orixinais e combinando elementos dos álbumes ilustrados, as novelas gráficas e o cinema, Brian Selznick traspasa os límites do concepto de novela, creando unha nova experiencia lectora con este libro, La invención de Hugo Cabret.


O director americano Martin Scorsese ten 11 nominacións aos premios Óscar por
"La invención de Hugo", a adaptación ao cine deste libro. Velaí tedes o tráiler de presentación...


Buscade o libro na Esperela!

27/01/12

RECOMENDACIÓNS SEMANAIS

Presume de ler e déixate ver

María Fernanda Guevara González, 3º ESO

Ata que o saibas todo, Juan Cruz Igerabide

O libro trata dunha nena de 14 anos que é cega, chámase Ester. Seu pai vese involucrado, misteriosamente, en problemas de narcotráfico. Ester fai todo o posible por axudalo e sacalo do cárcere coa axuda dos seus amigos e da súa tía.
Por outra banda, a nai da nena tense que agochar da policía porque cren que é cómplice do seu home. Mentres, a rapaza queda ao coidado da súa tía e do seu can Pipo, un can moi intelixente e que servirá de moita axuda.
Ademais, contan coa axuda de Rosa, profesora de Ester, que, en todos os momentos difíciles, está ao seu lado. Pola contra, "A Antipática", tamén mestra da cativa, atópase metida nos negocios sucios, dos que culpan ao pai de Ester.
Cres que poderán solucionar todos os conflitos que aparecen ao longo da historia?
Eu penso que é un libro que nos fai reflexionar acerca de todo o que temos e non valoramos dabondo, queixándonos a miúdo sen ter un porqué. Ester, a pesar do seu defecto intenta axudar a seu pai para que todo saia ben.
É un bo libro: divertido, ameno, intrigante e de moita acción. Recoméndovolo, vaivos gustar.

26/01/12

CHICO & RITA

Na Esperela tedes esta adaptación da película do mesmo nome. Chico & Rita é unha novela gráfica resultado do difícil traballo de facer unha adaptación á inversa. Este é un libro que xorde polo éxito da película.
Na Cuba de finais dos anos 40, Chico e Rita inician unha apaixonada historia de amor. Chico é un mozo pianista namorado do Jazz e Rita soña con ser unha gran cantante.
Dende a noite en que se coñecen nun baile na Habana, a vida vainos unindo e separando coma   personaxes dun bolero.
A película, dirixida por Fernando Trueba e o debuxante Javier Mariscal, gañou moitos premios europeos e opta este ano a un Óscar  como mellor filme de animación. A música, fundamental, é de Bebo Valdés.


Buscádeo na Esperela!

24/01/12

IMAXE DO DÍA

                     kiss-shot:

by  渡
          “Siempre imaginé que el Paraíso sería algún tipo de biblioteca”. 
                                Jorge Luis Borges.

23/01/12

CONCURSO DE MICRORRELATOS SOBRE O AMOR


CONCURSO DE MICRORRELATOS. AMOR ! AMOR ?... EN CEN PALABRAS


                               ATENCIÓN RAPAZAS E RAPACES:
Esta rapaza gañou o primeiro premio no concurso lingua de amor  porque...



...EN GALEGO LÍGASE MÁIS .Está demostrado. Frases míticas para facer as beiras  como: "ti es de aquí ou vés á festa?"  só con usalas conseguen efectos demoledores coa vítima escollida ( probade, probade...)
Por iso para facerlle os honores a San Valentín, que en febreiro sempre anda moi atarefado, convocamos a cuarta edición do concurso de microrrelatos que demos en chamar AMOR? AMOR!... EN 100 PALABRAS. 

ANIMÁDEVOS A PARTICIPAR, A VER QUEN CONSEGUE SER MÁIS ROMPEDOR NISTO DAS DECLARACIÓNS DE AMOR.


BASES DO CERTAME
AMOR? AMOR!... EN CEN PALABRAS
Primeira. Os participantes presentarán creacións literarias orixinais e inéditas ‑e non premiadas noutros certames‑ no xénero literario que desexen, ben en prosa, en verso ou en ambas as modalidades. A temática será o amor, en calquera das súas manifestacións: amor, desamor…

Segunda. As obras deberán ter unha extensión máxima de 100 palabras e levarán título. Estarán redactadas en lingua galega e poden estar escritas á man ou a ordenador.

Terceira. Poderá participar calquera membro da comunidade educativa do IES O Mosteirón (Sada). O prazo de presentación abrirase o día 1 de febreiro de 2012 no primeiro recreo e remata o 15 de febreiro no segundo recreo.

Cuarta. Os microrrelatos entregaranse na biblioteca durante os recreos; recolleraos o persoal docente con garda de biblioteca.
Os participantes deben presentar as obras dentro dun sobre, co título e cun pseudónimo ou nome falso por fóra. Dentro deste sobre, incluirase outro sobre máis pequeno –tamén co título do microrrelato e o pseudónimo por fóra‑ no que se indique o nome completo e a clase do autor ou autora do texto dentro.

Quinta. Os traballos serán expostos, segundo se vaian presentando, en lugares visibles e accesibles do centro.

Sexta. As obras serán avaliadas por unha comisión designada polo Equipo de Dinamización da Lingua Galega e mais polo equipo da Biblioteca A Esperela do IES O Mosteirón. Esta proclamará dous textos gañadores. Un para o primeiro ciclo e outro para 2º ciclo e Bacharelato.

Sétima. O anuncio da obra gañadora do certame farase o día 24 de febreiro. Terá lugar no ESPAZO CINEMA, no primeiro recreo.

Oitava. Os gañadores recibirán un premio sorpresa e un diploma acreditativo.

Novena. A participación no certame implica a aceptación destas bases.

22/01/12

E OS PALÍNDROMOS?


Nunha entrada anterior falamos dos anagramas, agora tócalle aos palíndromos (do grego palin dromein, volver ir cara atrás), que son palabras, números ou frases que se len igual para adiante que para atrás. Se falamos dun número chámase capicúa. Mirade estes exemplos:

ANA
SOMETEMOS
SE VAN SUS NAVES
A BREVE VERBA
NA MAN
A TORRE DA DERROTA

A construción de frases en forma de palíndromos remóntase a tempos moi antigos. Dise que foron inventados polo poeta grego Sótades no século III antes de J.C. Tamén din que primeiro palíndromo procede do primeiro home e foi en inglés: "Madam, I´m Adam"...
Gonzalo Navaza é o autor dun palindromario interesantísimo titulado A torre da derrotA. Aquí tedes un exemplo tirado deste libro.

E MAIO DOÍAME
O día caídO
Libra neves e ven abriL.
A min. Á ánimA.
Só oS
SoñoS 
Nos soños soños soN.
E maio doíamE.
E ven á nevE
A mirada cínica da rimA.


Nesta páxina encontraredes moitos palíndromos, veredes que curiosos...