DÍA DO LIBRO

Nesta semana tan especial, todo o alumnado do instituto fai actividades relacionadas co libro e a lectura: os de 1º participan no Fotolibro "Presume de ler e déixate ver", os de 2º analizan o mundo de Shakespeare e Cervantes mirando cos seus ollos, os de 3º visitan a libraría Moito Conto (e outra sorpresa que xa contaremos) e o alumnado voluntario de 4º volve a infantil cos apadriñamentos lectores.

MOITO CONTO!!

Anticipándonos ao Día do Libro, hoxe visitamos "Moito Conto". A idea era que os rapaces e rapazas de 3º de ESO gozasen da visita a unha libraría e tivesen a posibilidade de escoller e mercar os libros que eles queren para a biblioteca. 

A experiencia resultou un éxito: mercamos 36 libros moi variados: filosofía, sicoloxía, chistes, fantasía, biografías, terror, cómics, romanticismo... Todos marchamos moi contentos e con ganas de ler os nosos libros. Esta semana rexistrámolos e xa os podedes levar para casa!!

MOITO CONTO on PhotoPeach

Grazas ás libreiras de Moito Conto 

pola paciencia e os bos consellos!!!

EDUARDO MENDOZA, PREMIO CERVANTES 2016

Eduardo Mendoza ven de recibir hoxe o Premio Cervantes 2016, o premio das letras máis importante da lingua española.

O escritor, con quince novelas, dous libros de relatos, dúas obras de teatro e catro ensaios, é o autor de Sin noticias de Gurb, lectura no segundo trimestre en 4º de ESO.

Mendoza lembrou hoxe a importancia que para el tiveron as sucesivas lecturas que fixo do Quijote e como Cervantes determinou a súa vocación.

POESÍA EN TERCEIRO DE ESO

O alumnado de 3º de ESO anda a traballar a poesía visual e o haiku. Todo isto publicouse recollido nun fanzine que lles quedou ben bonito...

POESÍA on PhotoPeach

NOVIDADES

En vista do éxito de La lección de August, xa tedes na Esperela as continuacións da colección Wonder. Veña, que voan...

HAI 50 ANOS...

O libro de Gabriel García Márquez cumpre 50 anos!!

DÍA MUNDIAL DE CONCIENCIACIÓN SOBRE O AUTISMO

«Neste Día Mundial de Concienciación sobre o Autismo, axudemos todos a cambiar as actitudes cara as persoas con autismo e a recoñecer os seus dereitos como cidadáns, que, ao igual que todos os demais, teñen dereito a reivindicar eses dereitos e a tomar decisións sobre a súa vida de acordo aos seus propios 

desexos e preferencias.»

Mensaxe do Secretario Xeral de Nacións Unidas, 

António Guterres, con motivo do 

Día Mundial de Concienciación sobre o Autismo, 

2 de abril de 2017

MOSTEIRÓN NA RADIO

O proxecto de cine desenvolvido polos departamentos de Plástica e Visual e de Lingua Galega non deixa de dar alegrías. Escoitade a entrevista que emitiron está mañana na radio... (a partir do minuto 17:45)

PREME AQUÍ

HAI 75 ANOS...

O 28 de marzo de 1942, de mañanciña, morreu o poeta Miguel Hernández no "Reformatorio de Adultos de Alicante". O autor de 'El rayo que no cesa' pasou por ata trece presidios antes de morrer no de Alicante como consecuencia dunha tuberculose non tratada. Tiña 31 anos.

Vía Cadena Ser

DÍA MUNDIAL DO TEATRO

MOSTEIRÓN EN "EL PAÍS"

En "El País" deste domingo tedes unha reportaxe  sobre a actividade de cine que se está a desenvolver no noso IES, onde os rapaces visionan e reflexionan sobre o "cine de autor".

Parabéns a rapaces e profesoras!!

DÍA MUNDIAL DA POESÍA

Na Esperela quixemos unir tres datas importantes (o Día de Rosalía de Castro, o Día da Muller e o Día Mundial da Poesía) e facer unha exposición de mulleres poetas no primeiro andar do instituto. Penduradas do teito tedes as súas imaxes e na árbore da fiestra están os seus versos.

Feliz celebración!!

CONCURSO DE FOTOGRAFÍA NA ESPERELA!!

15 ANOS SEN CARLOS CASARES

O 9 de marzo de 2002 morría Carlos Casares, o ourensán ao que dedicamos este ano as Letras Galegas.

ELAS. POESÍA DE MULLER

POESÍA DE MULLER on PhotoPeach

Neste 8 de marzo, para conmemorar o Día da Muller, tivemos na Esperela a Dores Tembrás, que veu impartir un obradoiro de poesía e muller, "Elas. Poesía de muller", para o alumnado de cuarto de ESO.

Moitas grazas a Dores pola súa sensibilidade!

Grazas, rapazada, polo voso interese e participación!

CENTENARIO DA MORTE DE EDUARDO PONDAL

O 8 de marzo de 1917 morreu Eduardo Pondal, autor do poema "Os pinos", do que sairía despois o himno galego. Aquí vos quedan algunhas explicacións interesantes sobre o himno.

O DICIONARIO DE MARÍA MOLINER

María Moliner (1900-1981) escribiu soa e a lapis un dicionario dúas veces máis longo que o DRAE, o Diccionario de uso del español.

Fíxoo nos anos seguintes á depuración á que a someteu o franquismo. En plena posguerra, a filóloga e lexicógrafa aragonesa comezou a traballar no seu dicionario. Comezou exactamente no ano 1952: "Estando yo solita en casa, una tarde cogí un lápiz, una cuartilla y empecé a esbozar un diccionario que yo proyectaba breve, unos seis meses de trabajo, y la cosa se ha convertido en quince años".

Neste mes cúmprense 50 anos da súa primeira edición.

Vía voxpopuli.

LEOPOLDO MARÍA PANERO

Leopoldo María Panero (morto o 5 de marzo de 2014) foi un poeta español, pertencente ao grupo dos Novísimos.

A súa produción, culturalista e heterodoxa, ofrece unha complexa visión do mundo, condicionada polos seus problemas mentais e a súa experiencia en centros psiquiátricos.

OUTRO OBRADOIRO NA ESPERELA

180 ANOS CON ROSALÍA

A celebración do Entroido non impide que lembremos a Rosalía de Castro no seu día, cando se cumpren 180 anos do seu nacemento. 

A Esperela e o Departamento de Galego están facendo presente á poeta en todos os recantos do instituto. Mirade...

ROSALÍA DE CASTRO on PhotoPeach