MAREA NEGRA, NUNCA MÁIS

Hoxe cúmprense nove anos da rotura dun dos tanques do petroleiro Prestige fronte ás costas galegas. O día 19 de novembro o barco fendeuse pola metade e afundiu, provocando a  maior catástrofe ecolóxica de Galicia e que foi xerme dun movemento social e solidario sen precedentes.

Uns meses despois, Agustín Fernández Paz publica o libro que hoxe recomendamos,  A praia da esperanza.

"O derradeiro día das vacacións de agosto Raquel atopou unha enorme buguina entre as rochas da praia. Tróuxoa para a súa casa na cidade. Esa mesma noite, un golpe seco espertouna: a buguina estaba na alfombra e pola súa abertura asomaba unha diminuta serea. É Sunia, da estirpe das Sereas Minúsculas. Pedíralle axuda á buguina para poder facer amizade con Raquel, á que estivera observando nos seus xogos: quere pasar onda ela os meses de inverno, tan aburridos na praia solitaria. A cambio, contaralle un conto marabilloso cada noite.
Pasaron os días coas súas noites de amizade entre as dúas. Pero unha noite de novembro a serea, desacougada, non foi capaz de contarlle ningún conto: saía un cheiro moi desagradable da buguina e nela non se oía o mar senón un ruído estraño. Axiña empezou a botar  alcatrán como o das estradas..."